كليشيهيات مبتدئين التصوير..حاول تتجنبها | ميار الشحات

التصوير فن زيه زى اى فن, فالكليشيه بالنسبة لشخص ممكن مايكونش كليشيه للتانى, بس فى شوية صور كده اتهلكت ملوين مرة, ومافيش مصور مبتدأ مصورهاش, بس انت ممكن طبعا تتجنبها, او ماتتجنبهاش يعنى ماجتش عليك


١) الورد, الحيوانات, والاطفال
اول ماتجيب الكاميرا بيبقى اسهل حاجة تعملها انك تاخد صورة لأخوك الصغير, ولما تشوف التصورة بتحس بالفخر اوى لأنك بتستشعر مقولة ان الاطفال احباب الله..بس الحقيقة الصورة بتكون وحشة جدا, خصوصا لو مستخدم الفلاش المدمج بتاع الكاميرا..واخوك بيكون بيرخم عليك و بيعملك وش سخيف..أمسح الصورة فورا.

بتخلص صورة اخوك بتبُص حواليك تلاقى فازا جميلة مليانة ورد صناعى, بتكتشف حبك للطبيعة, بتزووم اوى على وردة معينة, وتروح واخدلها صورة..الله!

و يا سلام لو عندك كلب مثلا ولا قطة ولا عصفورة, كده ضمنت المودل بتاعك لأول 6 شهور مثلا.


٢) الشروق والغروب
اية الفكرة؟ اية الجديد طيب؟ طب ليه؟

عامة الورد والحيوانات والشروق والغروب حاجات دى كلها جميلة, و ممكن تاخدلها صور من غير ما تبقى كليشيه, بس الفكرة انك تاخد صورة لحاجة شكلها مش جميل اوى و تخليها جذابة, احسن من انك تاخد صورة لحاجة اصلا حلوة و كل الناس مجمعة علي جمالها.


٣) اعمل اى صورة ابيض و اسود
بتاخد صورة لأى حاجة و اى حد و فاكر انك لما تخليها ابيض و اسود بتبقى صورة عالمية..الحقيقة لأ خالص..الصورة الوحشة بتفضل وحشة حتى لو عملت فيها البدع.



٤) بوكيه (Bokeh)
البوكيه كلمة يبانية او صينية مش فاكرة بالظبط بمعنى blurred.. يعنى بتخلى الخلفية مش باينة او مش واضح ملامحها..الصور دى ممكن تبقى ممتازة, و ممكن تبقى كليشيه, لما تخلى كل صورك بوكيه بوكيه بوكيه..و ماتهتمش بالشئ او الـ subject الى انت بتبصوره لمجرد انك عايز تعمل صوره فيها بوكيه..يبقى فى حاجة غلط.


٥) تصور نفسك بالكاميرا فالمرايا..

مافيش حد فيكى يا مصر ماخدش الصورة دى...تمسك الكاميرا و تقف ادام المرايا و تصور نفسك..الله!


٦) توقيع الصورة
اعرف واحدة كل علاقتها بالكاميرا والتصوير لا تتعدى الأسبوعين, و بتاخد صورة لكوباية نسكافيه مثلا تملى الصورة توقيعات بأسمها...ليه؟!
انا واحدة من الناس مابحبش اشوه جمال الصورة بتوقيعى, خلاص انا بحطها مثلا على 500px او behance باسمى و حفظ حقوق الملكية, وماعنديش مشكلة لو حد استخدمها, انا مش بيكاسو يعنى :D بالعكس هكون مبسوطة.



٧) الأيديت والفلترز.
لأ ارجوك..ماحدش قالك ماتعدلش على الصورة بعد ماتاخدها, بس تعديل بسيط فى البرايتنس والكونتراست, فى الـlevels وحاجات بسيطة كده بتبرز الصورة لكن الفلاتر الغريبة العجيبة الى بتبوظ الصورة و تشوهها دى لأ ارجوك.


٨) تضيف كلام على الصورة

الصورة بتغنى عن الف كلمة, تروح انت واخد صورة و حاطط عليها كلام؟!

يعنى اية لازمة انك تاخد صورة للسحاب و تكتب عليها نفسها -مش caption- واطير وارفرف فى الفضا؟!


٩) البراويز
ماتحطش برواز ابيض, او اسود او اى برواز عامة للصورة بالـphotoshop.


١٠) صور الـlandscapes المملة                    

لو هتاخد صورة لاندسكيب اتأكد انها مش مملة, بمعنى ان اغلب الصور دى بتبقى تحت اخضر او اصفر , فى النص بحر, و فوق السما. اية الجديد؟


١١) HDR            

           

صور الـ HDR او الـ high dynamic range لازم تبعد عنها كل البعد...كـــــل الـــبـــعـــد


١٢) Selective color                             

انا مش من هواة الـ selective color او انك تاخد صورة ابيض و اسود ولون واحد بس الى يبقى موجود.



انا مش قصدى ان كل الصور دى ماينفعش تاخدها من غير ما تبقى كليشيه, وانا اكيد صورت صور من الى انا قولتها فوق دى..عادى يعنى كلنا بنتعلم :D

لو فى صور انت شايفها كليشيه قولنا عليها عشان ناخد بالنا :D

ميار الشحات #ميارلشحات #ميار #اmayarelshahat