معاناتى اليومية فى المترو | ميار الشحات

ماحدش يقدر ينكر فايدة المترو, بيختصر الوقت, بتهرب من زحمة الطريق, و رخيص....

اول استخدامى للمترو كان بسبب الجامعة..و ماما الى كانت عمالة تقنعنى اد اية المترو جميل و بيوفر الوقت و هيوصلنى الجامعة بسهولة..لكن لو خدت العربية هتحشر فى الطريق و هاخد ساعتين رايح وساعتين جى..
وعلى الرغم من انى عندى فوبيا من الاماكن المغلقة, و بيجيلى ضيق تنفس, الا ان ماكنش ادامى اى حل غير انى استخدم المترو..
طبعا اول اسبوعين كانوا عبارة عن توهان فى المترو..بلغبط فى الخطوط والمحطات..لكن دلوقتى -وبعد استخدام سنتين- بقيت خبرة! ..بعرف ابدل المحطات و انزل فين وكل حاجة تمام..بس كل دا ماجاش بالساهل, لو مالكش اى تجارب فى المترو هقولك شوية حاجات عشان ماتتصدمش..

1) شباك التذاكر زحمة جدا!

كل ماروح اجيب تذكرة و اشوف كمية الناس الى على شباك التذاكر بيجى فى بالى مشهد فى فيلم عربي, الناس ملمومة على شباك تذاكر سينيما فى وسط البلد فى ايام العيد..
غالبا كنت بخلى حد يروح يجيبلى تذكرة, او اشترى تذكرتين اول اليوم..ريحت دماغى و عملت اشتراك.

2) مش دايما هتلاقى السلم الكهربا شغال.

عادى, اعتبرها نوع من انواع الرياضة..حتى لو انت مابتعملش رياضة..خايفين عليك يا اخى!

3) لازم تقابل حد تعرفه.

المترو مليان ناس, لازم تقابل يوميا على الاقل شخص تعرفه, سواء من الجامعة او من الشغل او المدرسة او اى حاجة..المهم انك دايما هتقابل ناس صدفة..و دايما هيكون الوقت مش مناسب و هتكون مستعجل..فى الحالة دى انسى معادك و اعرف انه عليه العوض..ربع ساعة بوس و احضان و سؤال عن الاحوال!

4) الشهداء و العتبة.

محتاج تصلى ركعتين شكر لله يوميا لو مش بتنزل فى محطة من المحطتين دول..دول مش محطات لأ..دول بوابات لعالم الجحيم..اول ما تلاقى ان المترو داخل لى اى محطة منهم لازم تستخبى, لأنك هتتعمل ساندويتش او هتنزل فيهم بالاجراه بسبب قوة الدفع..الناس بتدوس على بعض حرفيا فى المحطتين دول.

5) اوقات الذروة..وما ادراك ما اوقات الذروة!

معاد رجوع الطلبة من المدارس و خروج الموظفين..ابشع وقت ممكن تركب فيه المترو..انا لو هستخد المترو فى الوقت دا ببقى شايلة الهم من اول اليوم..و بودع ماما و اخواتى و كدا..ماحدش ضامن!

6) لا تبالى!

المترو هيقف فجأة..كتير..ماتقلقش و ماتتخضش..الاول كان بيجى فى بالى كل الافلام الاجنبى الى شوفتها فى حياتى..و اد اية النهاية هتبقى مأساوية..بس قبل النهاية بثوانى بيروح المترو ماشى تانى..لغاية لما خدت مناعة!

7) تسوق من المترو بأقل الاسعار..

حد عايز مناديل مبللة؟ حد عايز كحل مابيسيحش؟ حد عايز دبابيس؟ شربات؟ كرت عشرة بعشرة؟ .. كل الحاجات دى هتلاقيها فى المترو..و مش عارفة ليه كل منتجاتهم سحرية..يعنى مثلا " الكحل السحر, مابيسيحش ومابيتشالش بالمياه" .. الجيب السحرى..الطرحة السحرية..اى حاجة عندهم سحرية..و بخمسة جنيه بس!
كمان ماتركزش معاهم اول لأنك هتلاقيهم بيقولوا حاجات مش منطقية ابدا.. " شراب بخمسة, اتنين بعشرة" والمفروض ان دا عرض خاص مش لازم تفوته!

8) اى حاجة انت بتقراها فى المترو بتبقى ملكية عامة!

لو بتضايق لما الناس تفضل تتفرج عليك و تقرا اى حاجة انت ماسكها..سواء كتاب او جرنال او حتى ماسك الموبيل, يبقى ماتركبش المترو..

9) ريحة المسك والعنبر

ريحة المترو جميلة جدا..و فى تهوية عظيمة فى المترو..مش هتحس باختناق او كمكمة ابدا..

10) مين يجيب التذاكر؟

لو هتركب المترو مع صحابك هتقضى مثلا ربع ساعة بتتعازموا على بعض مين الى هيدفع!  ممكن كل واحد يدفع لنفسه و ننجز يعنى!mayarelshahat mayar el-shahat ميار الشحات