مش عايزة اشتغل رسامة | ميار الشحات

ناس كتير بتعملى منشن لما يلاقوا وظيفة لمصمم او رسام او كده..لذلك لازم اقولهم اولا شكرا لانكوا فكرتوا فيها, ثانيا لازم اوضح انى مش عايزة اشتغل رسامة او مصممة او اى حاجة ليها علاقة بالمجال ده، لأكتر من سبب..

انا مش داسة الرسم والتصميم، الموضوع هواية يعنى..عارفة ان ناس كتير بتحب تشتغل فى هوايتها..بس مش انا..انا برسم عشان استمتع، الرسم من اكتر الحاجات الى بنفس بيها عن نفسى، بستمتع لما اشوف رسومات حلوة..بحب الفن، و بحب اشوفه و اعمله..لاكن ماحبش يكون ده شغلى..

حاولت كذا مرة انى اقبل شغل تصميم و رسم و بتاع بس حسيت ان الموضوع خنيق جدا بالنسبالى..حسيت انى مقيضة كده و ملزمة بحاجة معينة ارسمها، وانا ماكرهش فى حياتى اد الإلزام او الاجبار على حاجة مهما كانت..حسيت انى هبدأ اكره الرسم بسبب انى حولته لشغل..فكان لازم ابطل.

ماعنديش مانع خالص ان حد يشترى لوحة ولا رسمة من رسوماتى، بس بعد ما اكون الريدى رسمتها، مش هو الى طالبها..

انا كمان بكره جدا انى ارسم بورتريهات .. ناس كتير بتعرض عليا ارسمهم بمقابل مادى، بس انا مابحبش، و مش بلاقى متعة فى انى ارسمهم يعنى الا لو من قلبى :د

بضايق لما الناس تحصرنى فى دور الرسم :د انا بعمل حاجات تانية كتير جدا غير الرسم، بكتب، بصور، بخرج -حاجات على ادى يعنى-  بعمل انيميشن على ادى بردو، وحاجات كتير يعنى، ده غير انى فى اعلام، و مهتمة بالمجال ده، فياريت ابقى آجى فى بالكوا بعد كده لما تشوفوا فرصة فى مجال الاعلام بدل مجال الرسم :د 

شكرا لكل الى بيمنشنونى فى اى حاجة عامة...