لعنة الفشل والكسل والحماس المؤقت | ميار الشحات

مشكلتى انى دايما بفشل, انا بحاول كتير, بس غالبا بحاول فالسكة الغلط, بعافر فالحاجة الى مش بتاعتى, فبفشل..مش متأكدة انا بفشل عشان دى حاجة مش بتاعتى فعلا, ولا عشان انا ماحاولتش كفاية؟!

ساعات بصبر نفسي  "ميار انتى لسة هتبدأى العشرين, مش المفروض تكونى يائسة كدة, المفروض ماتكونيش يائسة اصلا, انتى المفروض تكونى بتبدأى حياتك.."

انا عارفة ان ناقصنى حاجات كتير, حاجات كتير اوى عيزاها و مش عندى, و حاجات كتير اوى مش بعملها, بس مافيش فى ايدى حاجة..و الشعور ده تحديدا, بيقتلنى.

بحاول انسى او اتأقلم, واتعامل بالى عندى, و بحاول اوصل للى ماعنديش, بس المشكلة مش فى انى ناقصنى حاجات, المشكلة انى ناقصنى ناس..الحاجات تتعوض, بس الناس لأ..

الى مسيطر عليا بقاله فترة كبيرة انى عايزة استقل ماديا, حاولت ابدأ مشروع اكتر من مرة, وكل مرة كنت بفشل اكتر من المرة الى قبلها, كل مرة بفشل, بتعب..و بحبط, و ببقى قرفانة من نفسى و من فشلى, لكن بعد فترة بكتشف ان مافيش حاجة ممكن اعملها غير انى ابدأ تانى و احاول فى حاجة جديدة..بس مهما كانت الحاجة اية, النتيجة واحدة..انى مابوصلش لحاجة.

أيامى مملة جدا, مابعملش اى حاجة تُذكر, ايام رتيبة, مش مهتمة بآخر الأسبوع, ولا أول الشهر, لأن كل الايام بالنسبة لى واحدة..وده شئ محزن جدا,دايما نفسي يكون عندى حاجة بصحى عشانها, حاجة بخلص كل وقتى عليها وانا مبسوطة, حاجة بشوفها بتكبر كل يوم.

حياة الى فى سنى مش المفروض تكون كده ابدا, المفروض تكون عفوية, مليانة تجديد و حياة, مش كل الايام سعيدة اكيد, لكن على الاقل مش زيى, انا حاسة انى بقيت احمد حلمى فى فيلم الف مبروك!

ساعات كتير بفضل اتخيل نقطة التحول الى هتحصل في حياتى, امتى وازاى؟ و هكون مستعدة ولا لأ؟ انا فعلا مستنياها جدا, بس برجع اقول كام واحد عاش مستنى نقطة التحول دى ومات قبل ما تجيله؟ و كام واحد عمل بنفسه نقطة التحول دى..

ساعات بحس انى مصابة بلعنة الفشل, والكسل, والحماس المؤقت..بتحمس للحاجة بشكل كبير جدا, بكسل فى النص, حماسى بيقل, فبفشل.

انا مش متأكدة حياتى هتكون عاملة ازاى, كل الى انا متأكدة منه انى لازم ابدأ, بس فالسكة الصح, فحاجة تبقى بتاعتى..

#ميار_الشحات #ميار #الشحات #ميارالشحات #ميار الشحات