مفاهيم خاطئة عن الجرافيك ديزاين | ميار الشحات

١) الجرافيك ديزاينينج ده حاجة سهلة خالص

واحدة من اكبر سوء الفهم المنتشرة ان موضوع الجرافيك ديزاينينج ده حاجة سهلة خالص! لمجرد ان كل شغلك بتعمله على الكمبيوتر مثلا، او لأنك ممكن تعمله فى اى وقت - لو مش مقيد بـ deadline - بس الحقيقة ان الديزاينينج زيه زى اى شغل تانى، متعب، و مرهق، يكاد يفوق الشغل العادى عامة لأنك بتبقى تحت ضغوط كتير..و الموضوع مش سهل، مش اى حد نزل البرامج خلاص بقى ديزاينر، لأ محتاج علم و خبرة و تجديد و كل حاجة..

٢) بتكسب دهب!

الناس فاكرة ان الجرافيك ديزاينر ده بيكسب دهب! هو بغض النظر عن ان فى اوروبا والدول المتقدمة الديزاينر له مكانته وف علا بيكسب كتير، بس اى ديزاينر محتاج وقت كبير جدا جدا عشان تعمل اسم زى ما بيقولوا، و كل ماكنت خبرة -مش بس بسنين الممارسة- كل ما كان شغلك هيتقدر، بس عامة فى مصر الديزاينر مش واخد نص حقوقه حتى.

٣) الديزاينر فاهم كل حاجة

قراية الافكار قدرة حلوة جدا، بس للأسف هى مش عند الديزاينر، فى ناس بتشرح الديزاين الى عيزاه بطريقة مبهمة جدا و فى الآخر تلوم الديزاينر انه ماعملش الى فى دماغهم..طب حضرتك انا هعرف الى فى دماغك منين؟!

٤) الزبون دايما على حق!

من اكبر المشاكل الى بتواجه الديزاينر هى تدخل العميل فى صميم شغله، دى حاجة مقرفة فعلا، اوك قولى انت عايز الديزاين ازاىو اقتراحاتك، و الفكرة الى عايز توصلها، بس سيبنى اعملها بأسلوبى، مش معنى انك بتدفعلى، انك تتدخل فى شغلى يعنى، لما بتروح لدكتور بتدفعله بس مابتقولهوش يكتبلك انهى دوا..و هكذا..

٥) يا بختك مابتذاكرش!

الحقيقة ان الديزاينر مابيبطلش تعلم، هو تعلم يعنى مش هنقول عليه مذاكرة، انك تتعلم اساليب جديدة، افكار مختلفة، ستايلات جديدة، او انك تدرس الكلاسيكيات و تطورها و هكذا، فهو قدامك آة مابيذاكرش لكنه مابيبطلش تعلم.

٦) مافيش اسهل من التعديل على التصميم

الحقيقة ان التعديلات مابتبقاش بمنتهى الشهولة الى متخيلينها دى، فأنت بالنسبالك انه هيزود نضارة بس مثلا على الكاركتر، بس ده هيتطلب هد التصميم و بناءه من اول و جديد.

٧) موهوب بالفطرة

على فكرة لو واحدة عنده 30% موهبة و اشتغل على موهبته دى وبيطورها بالممارسة، هيغلب الى عنده 70% موهبة و ماشتغلش عليها.

٨) أى حد ممكن يبقى جرافيك ديزاينر عادى يعنى.

أكيد مش أى حد، زى ما مش اى حد ممكن يبقى مهندس ولا دكتور ولا مخرج..الموضوع مش مجرد انك تلعب شوية بالفوتوشوب، هو اسلوب حياة :D اى حاجة بتشوفها بطريقة مختلفة, بتجذبك الالوان, الاشكال, الفن فى اى حاجة, مابتملش من البحث و التجربة و التعلم, عندك شغف دايما بالفنون و انك تتعلم اساليب جديدة و تطور نفسك..حتى الاحباط, هو جزء كبير من حياة الجرافيك ديزاينر :D