عقدة

كانت راجعة من الشغل,وكان فى  شاب ماشى وراها من اول الطريق تقريبا..وعمال يقولها فى كلام بتفهم شوية منه و اغلبيته مافهمتهوش..بس كان واضح انه بيعاكسها يعنى..

وفجأة بدأ يقرب منها اكتر لحد ما لمسها..راحت لفت تلقائيا و ضربته بشنطتها بكل قوة و خوف..و جريت لحد ما وصلت لبيتها..بس هو كمان كان بيجرى واراها..

اول ما وصلت البيت قفلت باب الشقة جامد و فضلت واقفة وراه..حاسة انه هيقتحم البيت..كانت مرعوبة,شبه ميتة..

نزلت الشغل تانى بعد اسبوع..لقته بيراقبها و عمال يبصلها بصة فيها انتقام..

قررت انها مش هتروح الشغل تانى..بطلت تخرج مع اصحابها..حتى لو احتاجت حاجة من الشارع بتحاول تلاقيلها اى بديل..

الولد دا اترفد من المدرسة -الى ماكنش بيدخلها طبعا- و كان بيقف قدام الباب يعاكس فى البنات الى رايحة والى جاية..
وطبعا كان بيشرب كل انواع المخدرات..لحد ما مات بعد 3 شهور "اوفر دووس"..
مات هو و سايب العقدة الى خلقها فى البنت عايشة جواها,مقيداها,مخلياها مش عارفة تعيش!