بين الواسطة والشوكولاتة

بتكلم على الواسطة,لو تأمل فى اى حاجة فى مصر دلوقتى هتلاقيها لازم تمشى بالواسطة..لك حد له نفوذ,هتوصل للى انت عايزة..مالكش..مايلزمكش!

المهم ان انا قررت انى مش هستخدم الواسطة ابدا طول حياتى,لأن الاعتماد على الناس مش هيوصلك لحاجة,,لو حد عملك اى خدمة و كان واسطة لك..هيفضل يذلك بيها طول العمر و هتحس ان الشخص دا له عليك جمايل..فى حين ان ربنا دايما بيدلنا حاجات بس مابنحسش بأى امتنان لربنا!

انا مقتنعة ان الى مكتوبلى هشوفه..و هيحصلى,سواء اعتمدت على ربنا او اعتمدت  على الناس..

فالأحسن انى اعتمد على ربنا..

كان فى مرة بنت صغيرة رجعت من المدرسة تعبانة جدا و نفسها تتغدى و تاكل اكلة حلوة..كانت فى آخر حصة عمالة تتكلم هى و صاحبتها على الاكلات و اية اكتر حاجة بيحبوا ياكلوها..البنت راجعة نفسها مفتوحة جدا..و اول ما امها حطتلها الطبق اتصدمت!..لقت الاكل وحش جدا!..فيه كل مقومات الاكل الوحش!..

و من ضمن العيوب الى فيه ان الملح كان كتييير اووى..

البنت ماقدرتش تيجى على نفسها و تستحمل و تخلص الطبق..

راحت فتحت التلاجة,لقت شوكولاتة حلوة اووى..الشوكولاتة الى بتحبها..

خدتها و اكلتها و فرحت اوى و انبسطت..و نسيت طعم الاكل الوحش خــالــص!

و راحت تنام

بعد شوية الام فتحت التلاجة,كانت بتدور على حاجة بس ملقتهاش..

ولقت ورقة الشوكولاتة جنب البنت..اضايقت اوى..ولما البنت صحيت امها قالتلها

 "انتى ليه اخدتى الشوكولاتة من ورايا؟..انا كنت جيباها ليكى انتى و شيلاها عشانك..كنت هديهالك..بس فى الوقت المناسب..كنتى هتخديها كدا كدا..ليه اخدتيها من ورايا من غير ما اسمحلك؟.."

-"يا ماما الاكل كان وحش اووى..ماقدرتش انسى طعمه الوحش غير بالشوكولاتة..وبعدين انتى اتأخرتى..ليه ماديتيليش الشوكولاتة من بدرى؟..ليه استنيتى كل دا؟..انا خُفت تكونى مش هتديلى الشوكولاتة دى ابدا!"..

ولله المثل الاعلى,بحس ان نفس القصة دى بتحصل مع اى حد بيستخدم الواسطة..بيعتمد على حد عشان يوصل للى هو عايزه..اصله استنى ربنا يساعده بس مالقاش فايدة..

نسى ان ربنا بيعملنا كل حاجة بس فى الوقت المناسب لأنه يعرف اية الاحسن لينا..

ماتعتمدش على حد,الى ربنا كاتبهولك هتشوفه..اتوكل على ربنا و خد بالاسباب..و ربنا هيكرمك و مش هيخذلك ابدا.