الشغلانات الى كان نفسى اشتغلها..

واحنا صغيرين كل يوم تقريبا بيبقى نفسنا نطلع حاجة غير اليوم الى قبله,بس انا وانا صغيرة ماكنتش بفكر اطلع حاجة معينة,بس اوا فى اعدادى و ثانوى كدا كنت بفكر انا عايزة ابقى اية ..كان نفسى ابقى حاجات كتير,وفالآخر بقيت حاجة غير كل الى كان نفسى فيه..او الحقيقة,انا لسة مابقتش.

طبيبة بشرية

اة كان نفسى ابقى طبيبة,طبيبة بشرية,جراحة عامة,مخ واعضاب,قلب,اى حاجة من الحاجات المتعمقة دى,لأنها حاجات بشعة,ولازم اساعدهم بأى حاجة..بسلما فكرت كدا,,لقيت ان مش هينفع فى مصر الكلام دا عشان الامكانيات..يعنى مثلا لو جالى العيادة حد بسيط ماعهوش فلوس,ومحتاج عملية فى القلب مثلا..وهتتكلف اد كدا..اكيد مش هيقدر يتكفل بالمصاريف..وانا مش هقدر اساعده,هفضل بس بتعذب معاه انى مش قادرة اعمله حاجة!

و بعدين قولت خلاص,انا ابقى طبيبة اطفال,بس لأ لأ,ماقدرش اشوف طفل عمال يصرخ و يعيط و يصوت وانا اكون السبب فى دا

خلاص بلاها اطفال

خلاص الاحسن بلاش طب اصلا,

صيدلانية

نفسى  ابقى صيدلانية
,اعمل ادوية واخترع ادوية لامراض مزمنة.وافرح ملايين الناس الى بيعانوا من المرض دا..وانا بفكر كدا,دخلت 

صيدلية اشترى كونجستال..لما شوفت الصيدلانى الى واقف , صرفت النظر تماما

مترجمة

جتلى فترة فكرت جديا انى اكون مترجمة..دا ممكن يتيحلى الفرصة انى اسافر بلاد كتير و اشتغل فى شركات عالمية والحاجات دى..بس صرفت النظر لما عرفت ان فى مُدرسة عندنا المفروض انها خريجة لغات و ترجمة فورية..بس هى بتشتغل مدرسة لـكى جى

وانا بروح من المدرسة , كنت بعدى على كلية فنون جميلة,عجبتنى الفكرة..برسم كويس..و بحب الفنون عمووما..خلاص..هى دى..هدخل فنون جميلة..و قررت كدا خلاص

ولما خلصت ثانوية عامة ومستنية التنسيق وكدا,كنت مظبطة الدنيا على انى خلاص فنون جميلة..اكتشفت ان فى حاجة اسنها امتحان القدرات..اكتشفت كدا بعد ما معاده خلص!ومادخلتش امتحان القدرات,لأنى ماكنتش اعرف معاده..وبناءً عليه مادخلتش فنون جميلة!

انتهى الامر كالآتى

طيب اعمل اية اروح فين ادخل اية اقضى اربع  سنين بعمل اية..لقيت كلية اعلام,قولت يلا مش مشكلة..ادخل اعلام,لقيت فيها شعبة عربى و شعبة انجليزى,,دخلت الشعبة الانجليزى..و هعمل اية بقى مش عارفة..بس يلا..كلها طموحات وامانى :D
____________
ميار الشحات