4/10/2015 | ميار الشحات

الفيس بوك بعتلى نوتيفيكيشن من شوية عشان اشوف البيدج بتاعتى الى كنت عملاها من 2010 وبعدت عنها لسنين يعنى..

كنت بحب التصوير جدًا من ساعتها, بس طبعا بامكانيات اللا امكانيات.. كاميرة ضعيفة جدا هى كل ما املك..حتى الفوتوشوب مكنش ليا فيه خالص ساعتها..او بعرف اعمل بيه الحاجات البسيطة جدا..و مكانش في ايامها الابلكيشنز المهولة بتاعة الفلاتر دى..كنت بصور بشغف جدا..والكاميرا ماكانتش بتفارق ايدى حرفيا..لحد ما بطلت لفترة, واتجهت للرسم..بدأت الرسم فى 2012, الى  جذبنى رسومات الديجيتال آرت الى كنت بشوفها فى روايات الانجليش الى كنا بناخدها فى  المدرسة..كانت بتبهرنى, وكانت امنية حياتى -لحد دلوقتى- انى اعرف اعمل حاجات زيهم.. كل ما احاول ماعرفش، الموضوع مش سهل، ومحتاج دراسة كبيرة، وانا للأسف ماقدرتش ادخل فنون جميلة، بس اعلام حلوة بردو -بصبر نفسى- 

المهم قولت اما آخد فكرة كده و ادخل اشوف الصفحة والحاجات الى كنت بنزلها..وقارنت بين شغلى فى 2010 و شغلى دلوقتى..
الجدير بالذكر انى كنت بعانى من احباط الايام الى فاتت عشان شيفانى مابتطورش و هفضل طووول عمرى فى نفس النقطة .. بس الحمد لله الواحد بيطور يعنى :D حتى لو التطور ده بسيط..بس طالما باخد خطوة لقدام خلاص..
خمس سنين, اتغير فيهم حاجات كتير, انا نفسى اتغيرت كتير, و الظروف اختلفت, 
حاولت في حاجات كتير و فشلت, بس مش مشكلة يعنى, المهم انى حاولت, المهم انى لقيت الى يقف جنبي و يساعدنى و يشجعنى فى اى حاجة انا مقبلة عليها  بدون اى مقابل, وبدون اى شروط..
فى حاجات نجحت فيها كمان, وحاجات ماكنتش اعرف انى هقدر اعملها فى يوم من الايام زى الموشن جرافيكس مثلا..واتعلمت الاساسيات اهو و بتطور..أهم حاجة فى الموضوع انى عمرى ما اخدت كورس فى اى حاجة من الحاجات دى..كله تعليم ذاتى من النت..تعب سنين بدور فى كل حتة على النت عشان اتعلم الحاجات الى عايزة اتعلمها، الموضوع ماكنش سهل ابدا.
فى حاجات كتير اتعلمتها, و فى حاجات كتير لسه ماقدرتش اوصلها, المهم انى اتغير فيا حاجات جذرية, زاد الشغف و الفضول,بقيت لما اشوف حاجة وتعجبنى ماسكوتش غير لما اعرف اتعملت ازاى..
انا ممتنة جدا لكل الظروف, و لكل الناس الى شجعتنى فى يوم من الايام, لأنى من غيرهم كنت هكسل و هستسلم لحالات الاحباط الى بتجيلى كل خمس دقايق دى..
مستنية اشوف هبقى فين بعد خمس سنين تانيين..
ميار الشحات