الاجازة دى كانت مليئة و بشكل ملحوظ بالخطوبات و الجوازات..كنت مروحة من خطوبة واحدة صاحبتى,ففكرت وسألت نفسى سؤال.."وبعدين؟" اية الى هيحصل بعد كدا..بعد كل الضحك و الرقص و التصقيف الى فى حفلات الخطوبة والافراح..اية الى بيحصل؟..سيناريو واحد معروف..هيبقوا بيت مصرى عادى و اقل من العادى,الاول هيبقوا فرحانين جدا ببعض,وحبيبى و حبيبتى و بتاع,بعد شوية هتبدى تقوله هى مامتك بصتلى كدا ليه؟!..وهو يقولها هى ليه مامتك اتكتلى عالسين و هى بتسلم عليا؟
دى
مش هتبقى اكبر مشاكلهم,شوية
و اسألة من نوع "ها,مافيش
حاجة فى السكة؟" هتبتدى
ترف عليهم من كل حتة,ودا
هيشكل عليهم ضغوط طبعا..ولو
ربنا رزقهم بطفل على طول,مش
هيسلموا بردو من اسألة "هاا
بنت ولا ولد؟"..و
لو ولد بيقولوا بنت بردو عشان الحسد..وسبحان
الله بقدره قادر بيتحول ولد فى آخر خمس
ثوانى
البامبرز
و السيريلاك بيبقوا اكبر كابوس بالنسباله,و
بيدخل فى حالة من اكتئاب,بيبتدى
يقعد على القهوة يتشارك مع صحابه فى الهموم
ونَفَس الشيشة..وفجأة
رنة موبايله بتقطع الصمت "الو
يا حبيبى,هات
وانت جاى نص جبنه رومى,و
اربعة زبادى,و
باتنين جنيه عيش"
وبيتحول
هو لموظف رسمى...خلاص
بتبقى كل همومه انه يضرب الارض يجيب فلوس
عشان يدخل عياله مدارس خاصة عشان هما مش
اقل من ولاد عمامهم ولا خالاتهم..و
يشتركلهم فى نادى محترم عشان يتدربوا
سباحة -ولازم
سباحة-,ويخليهم
يصيفوا فى اى بورتو من البورتوهات الكتيرة
الى فى مصر,ما
هما مش اقل من زمايلهم فى المدرسة
ولما
يروح البيت,لو
حاولت تتكلم معاه شويه هيقولها مصدع,عايز
انام,عندى
شغل,هتفرج
عالماتش,واشياء
من هذا القبيل..
هى
هتحس انها خلاص مابقتش من اهتماماته..وان
مش دا الى حبيته واتجوزته وكل دا..
اما
عنها,فهى نسيت
كيانها خالص,غالبا
بتسيب الشغل اول ماتتجوز,وتبطل
دراسة اى حاجة..مافيش
حاجة اسمها موهبة بتنميها,او
هواية بتمارسها..صحابها
غالبا بتعملهم بلوك كلهم..بنات
قبل ولاد..وبتحصر
حياتها كلها فى بنى آدم واحد..و
فجأة بتتقلب حياتها و كل الى بتهتم بيه
حاجات غريبة..مثلا
طريقة عمل البامية..ازاى
تعمل طشة الملوخية..تجيب
الولاد من المدرسة..توديهم
التمرين..ازاى
مايبقوش اشطر من ولاد خالتهم؟!..وخناق
مع المدرس الفلانى عشان زعق لواحد من
ولادها..الفراغ
المعنوى بيخليها تركز فى اقل حاجة و تعمل
منها مشكلة.. مين
سلم عليها؟ ومين ماتصلش بيها..ومين
ماقلتلهاش كل سنة وانتى طيبة..ومين
ماعزمتهاش على عيد ميلاد ابنها,وما
الى ذلك..
الفجوة
بينهم كل يوم بتكبر..بيبتدوا
يتخانقوا على اتفه الحاجات..والخلاف
بينهم بيبقى عادة..ماحدش
فيهم بيقدّر التانى..وكل
واحد فيهم بيبقى شايف نفسه مظلوم,ماحدش
فيهم بيقدر ان الى وصلهم لكدا هو انهم
حصروا حياتهم كلها فى حاجة واحدة,وفى
حد واحد..الجواز
مشاركة,يعنى
كل واحد يشارك التانى فى حياته,فى
اهتماماته..لكن
طول ما كل طرف بيحاول يمحى شخصية و كيان
الطرف التانى,عمر
العلاقة ما هتنجح..
على
العموم,احنا
كان لازم نفهم طبيعة الموضوع من زمان,من
ايام ماكنا بنتفرج على افلام ديزنى,مثلا
ماقالولناش لما سيندريلا اتجوزت الامير
اية الى حصل بعد كدا...وكتبوا
نهاية سعيدة..كتبوا
ان جوازهم كان النهاية..مش
البداية!
_________________________________________________________
ميار الشحات
