مشكلتى مع مُدّعى المثالية

انتى عندك مشكلة مع مدعى المثالية ليه؟ و مين قالك انه بيدعى المثالية مش بيطمح ليها..

مش ممكن يكون فعلا بيحاول يكون مثالى؟ بتحكمى عليه ليه؟ و كمان عندك مشكلة معاه؟! بتنفسنى منه وش!

اولا, خلينا متفقين ان مافيش حد مثالى, ولا هيبقى فى حد..و خلينا متفقين بردو ان فى ناس بتحاول فعلا انها تكون مثالية,بس مش هتوصلها بردو بالمعنى الحرفى,بس بيحاولوا و دول صادقين..مشكلتى مش معاهم...انا مشكلتى كلها مع مدعى المثالية..

وخلينا متفقين ان بيبقى باين عليهم اوى انهم بيمثلوا, و انهم منافقين .. و اليك بعضاً من صفاتهم :

تلاقى الواحد منهم سِمِح فى نفسه كدا : على طول عامل ابتسامة صفرا كدا , الى هو بُص انا كيوت ازاى! .. بُص انا بسمع رأيك المختلف عن رأيى تماما برحب صدر ازاى! و بعد كل كلمتين يحُطلك الايموشن دا :) للدلالة على السماحة و الكيوتنيس.
بيميل الى عمق : بيتريق على الناس الى مش عميقة فى بوست طويييهيييل على الفيس بوك .. و بعديه يتريق على الناس الى بتتريق على الناس الى بتتريق على الناس العميقة فى بوست آخر اطول منه .. بحيث يرضى جميع الاطراف
لو اى حد شكر فيه او فى اعماله مثلا او بوستاته اللطيفة الى بيكتبها او قاله حاجة على آسك.اف ام .. يقوله "صدقنى انا مش انسان كويس زى ما انت فاكر :) " و دا طبعا عشان يبين هو اد اية متواضع و ما الى ذلك..

حرصه كله هو تجميع الفلورز على الفيس بوك او تويتر..من اجل تكوين Fans Base يتقبلوا اى حاجة هو بيكتبها و يسقفوله و يهيصوله و يدوله البريستيج المطلوب..بيكتب اى كلام فى بوست و هو عارف ان اغلب الناس مش هتقرا الكلام بس هتعمل لايك و شير...عشان دا انسان مثالى -فى نظرهم-..

مشكلتى كمان معاه انه مش صريح مع نفسه كدا..و غالبا بيعانى من اضطرابات نفسية معقدة...

عموما هما نوعين,

نوع بيكدب الكدبة و بيصدقها و بيعيش فى الدور اوى..

و نوع بيبقى عارف انه بيكدب وانه منافق بس عاجبه الدور و قرر يستمر فيه دون ادنى محاولة لتحسين شخصيته والسعى للمثالية بخطوات فعلية..ويتعب نفسه ليه؟ ماهو فى نظر كل الناس انسان مثالى فعلا و مثل اعلى!

- طب انتى مضايقة ليه..ماهو بيساعد الناس على انهم يبقوا احسن و بيديلهم inspirations .. مالناش دعوة بقى هو مثالى فعلا ولا لأ!

- ببساطة البلوج دى عن مشكلتى معاهم بوجه عام, تحتمل الصواب او الخطأ :)

اظن لاحظتوا اد اية الرد fake و مصطنع و اداء over و مش متصدق..فى حين ان فى ناس كتير ممكن تشوفه رد جميل جدا ومثالى..و هنا مربط الفرس.

____________

ميار الشحات