عايزة اكتب حاجات كتير بقالى فترة, بس مش لاقية وقت..
انا مابعملش اى حاجة من الحاجات الى مفروض اكون بعملها, و من الحاجات الى شغلانى طول اليوم..
يعنى انا مثلا مفروض اذاكر عشان امتحاناتى بقت الاسبوع الى جى فجأة وانا تعبت من المفاجأة و اكيد طبعا نزلت دمعتى.. *فاكس*
بس لأ مابذاكرش, مع ان طول اليوم بالى مشغول بأية الحاجات الى مفروض اذاكرها, واد اية هما حاجات كتير..و ان الامتحانات قربت وانا لسة بحضر محاضرة الماركتينج على اساس انها محاضرة البيزنيس!
طب هذاكر امتى؟ ماعرفش..شايلة هم كدا وخلاص
مثلا مفروض اعمل شغل كتير..كله معطلاه..بدل ماشتغل فيهم شوية اروح انا جايبة فيلم ولا مسلسل..او حتى ارسم اى حاجة كدا من دماغى مالهاش علاقة بالشغل الى عليا..
مفروض انزل اصور حاجات معينة
اقرأ حاجات معينة
اكتب عن حاجات معينة
وكل دا مش بعمله..
بس شايلة همه
ملخص يومى انى بصحى, شايلة هم الحاجات الى ورايا والحاجات الى مفروض اعملها..
بفضل طول اليوم افكر اد اية مكركب عليا حاجات..
كل دا فى دماغى بس, لكن فى الواقع باكل..و برسم..و بتفرج على كام فيلم و كام حلقة من مسلسل..
وانام وانا لسة شايلة الهم..
دا غير هم "الحفاظ على العلاقات الاجتماعية والدوائر المحيطة"..
انا مابقاش فيا دماغ لكدا..دانا مابقتش اقدر ارد على الواتساب ولا اكتب لحد كل سنة وانت طيب على الفيس بوك
كسل كسل كسل..واليوم بيخلص فى لا شئ
والعمر بيخلص بدون اى شئ ملحوظ
التكرار
والروتين
والملل
و رتابة الاحداث
والخوف
والتفكير
والتردد
محاولة انك ماتزعلش حد منك
ومع ذلك مش فاضى لحد
مع انك مابتعملش حاجة
مع ان وراك حاجات كتير
شغفى بالحاجات بينتهى بسرعة،
مابقتش احب افضل كتير مع حاجة معينة..
مش عارفة اية الى ممكن يفرحنى الايام دى غير انى اكسر الروتين
ومافيش حاجة هتخلينى افرح اد انى اسافر..
اسافر كتير..
وماستقرش فى مكان..
دى احسن حاجة بالنسبالى..
انا مابقتش اعرف اكبر دماغى زى الاول،
وإن مايبقاش فارق معايا حاجة،
بس مع ذلك ماباخُدش اى خطوة..
