الفرق بين التصوير زمان و دلوقتى

زمان..ماكنش في حد عنده كاميرا..و كان التصوير عند المصوراتي..و كانت العيلة بتتصور في المناسبات و الاعياد بس..وكان التصوير حوار بقي..بيروحوا للمصوراتي..و يتصوروا..و يستنوا اسبوع عشان الصور تطلع..وكانوا بيحتفظوا بصور حقيقية علي ورق.. بعدها بفترة..في شوية ناس بقي معاهم كاميرات..بس كان التصوير حوار بردو..افلام بقي و تحميض و بتاع.. كانوا غالبا بيصوروا المناسبات والاعياد واللحظات المهمة بردو بس من غير ما يروحوا عند المصوراتي..كان الحوار اسهل شوية..

و بعدها نزل الموبيل ابو "قاميرا".. ثم الموبيل ابو "قامرتين" .. و ظهرت مواقع التواصل الاجتماعي الي بتخلي كل الناس جواها دافع التصوير ..سواء بيصوروا نفسهم او بيصوروا الاشياء..و زادت نسبة التصوير بشكل كبير..و تقريبا انحصر دور المصوراتي انك بتروحله لما بتكون عايز صور 4X6.. صور خلفية بيضا..صور للاعدادية..الثانوية..الباسبور -عقبالنا- ..و اشياء من هذا القبيل

 ومن ساعة ما ظهرت السمارت فونز..زاد حوار التصوير دا جدا...ومن فترة كدا انتشرت ظاهرة بنت كلب اسمها الselfie .. كل الناس بتتصور مع كل الناس..في اي وقت..بدون اي دافع غير انه selfie! ناس مابيطيقوش بعض تلاقيهم متصورين سيلفي مع بعض و ينزلوها علي انستجرام #insta_el7ob_kolo #bestie #7ebek_awi..


بيستي اية بس و "حيبيك" ازاي يعني؟!..صلوا عالنبي ياخواننا

مابقاش في حب في الصور كدا بقينا بنتصور من اجل التصوير..مش من اجل الاحتفاظ بذكري معينة مثلا مع ناس بنحبهم.. كل الصور الي علي موبيلك دي ماتفرقش معاك في حاجة..بدليل ان لو اتمسحوا كلهم دلوقتي ولا هتتأثر..عادي يعني..بكرا نتصور قدهم عشر مرات!

 فهحاول بعد كدا ماتصورش غير مع الناس الي بحبهم و الي بيحبوني فعلا بس..مع الناس الي عايزة احتفظ بذكري حلوة لينا مع بعض.. هحوّل الصور الي بحبها من ديجيتال لصور ملموسة..اقدر احتفظ بيها فعلا...هحاول ابطل اتصور تقضية واجب كدا وخلاص..

P.S:

 انا تقريبا اكتر واحدة بتاخد سيلفي في العالم
And i used to take selfies before it was too main stream
____________
ميار الشحات