ماحدش بيتحرك ولا حد فكر انه يقوم يرد على التليفون..
غالبا ماحدش بيرد على التليفون غير ماما..لأن الى بيعوز حد فينا بيكلمه على الموبيل او النت.
التليفون عمال يرن..
التليفون عمال يرن..
زهقت قولت اشوف مين الى مصمم يتصل دا..
- الو
- الو يا حبيبتى ازيك
- الحمد لله، مين معايا؟
- اية دا انتى مش عارفانى؟
- لا والله معلش مش واخدة بالى..
- اخس عليكى..معاكى طنط فيفى يا حبيبتى..
- آة اهلا يا طنط ازيك؟
- الحمد لله يا حبيبتى انتى عاملة اية؟
- الحمد لله
- وماما عاملة اية و اخواتك؟
- الحمد لله كويسين..
*19 سؤال تانيين اجابتهم الحمد لله *
- و بابا..كويس؟
- اة الحمد لله..
- لسة مسافر ولا جه؟
- لا يا طنط لسة مسافر
- اة..طب اية مش هيجى قريب؟
- ماعرفش والله يا طنط
- لا يا حيبتى ماهو لازم اما يجى او انتوا تروحوله..كدا مش هينفع
*ايوة يعنى هى عايزة اية دلوقتى!*
- آة ماحنا بنشوف الموضوع دا يا طنط..حضرتك عايزة ماما صح؟
- اة يا حبيبتى هاتيها كدا اسلم عليها لاحسن هى مابتسألش خالص مش عارفة اية الى واخدها مننا
- للأسف يا طنط هى مش موجودة دلوقتى اول ما ترجع هقولها تكلمك حاضر..
*الحمد لله هتقفل*
- اية دا اومال هى فين؟
- مش عارفة والله يا طنط هى فى مشوار، بس اكيد اول ماترجع هقولها تكلمك..
- قوليلى صحيح، دهنتوا الريسيبشن زى ما كانت بتقول ولا لسة؟
*ريسيبشن؟! ريسيبشن اية؟..وانا مالى اصلا! هى مش هتقفل ولا اية!*
- لا يا طنط لسة
- ليه بس هو مش انتوا كلكوا خلصتوا امتحانات..هى قالت هتعملوها فى الاجازة..الحقوا بقى اعملوها قبل رمضان..
- آة ضرورى طبعا..
- صحيح، اختك الى فى ابتدائية عملت اية فى النتيجة؟
- الحمد لله..
- الحمد لله على كل حاجة طبعا بس جابت كام يعنى؟
- مش فاكرة 97 او 98 حاجة كدا..
- ما شاء الله ما شاء الله..انتى عارفة هيثم ابن اخويا جاب 78 ..ابوه منكد عليه..بس بينى و بينك يستاهل..دا دافعله فلوس اد كدا فى الدروس..
- معلش بقى يا طنط المهم انهم عدوا وخلاص..
- أة، وانتى نتيجتك طلعت؟
- لأ لسة..
- اكيد هتجيبى امتياز طبعا..
- ان شاء الله..مش فارقة كتير يعنى..
- و كريم اخوكى لسة ماشتغلش؟
*يا رب ارحمنى*
- لأ يا طنط لسة..
- لا ماهو مفروض يشد حيله كدا..هو فاكر ان الشغل هيجيله لحد عنده ولا اية؟..لازم يتعب شوية..
- ...........
- صحيح انتى سيسى ولا اخوان؟
- سيسى ولا اخوان ازاى يعنى يا طنط؟
- انتخبتى مين يعنى؟
- لأ انا مانتخبتش..
- ليـــــــــــــه؟؟ كان لازم نتزلى تنتخبى السيسى طبعا!
- ماتقلقيش يا طنط انتوا قومتوا بالواجب و زيادة..
- ربنا يستر على البلد..بس هو السيسى هو الى هيعدلها الصراحة..
- ............
- طب يا حبيبتى مش عايزة اطول عليكى بقى..
*يا بنت التيت!..كل دا ومش عايزة تطولى عليا؟!!!!*
- لما ماما تيجى بقى خليها تكلمنى
*وتكلمك ليه؟! مانتى عرفتى كل حاجة منى خلاص :D *
- حاضر يا طنط اكيد...
- مع السلامة..
- سلام.
*سجدة شكر لله*
*ندم شديد على انى رحت ادر على التليفون*
و اخيرا ماما جت..
- ماما, طنط فيفى اتصلت بيكى و عيزاكى تكلميها..
-آة كويس فكرتينى..
-ماما....هى مين طنط فيفى دى؟!
mayarelshahat ميار ميار الشحات مدونة ميار الشحات mayar el shahat mayar el-shahat
mayarelshahat ميار ميار الشحات مدونة ميار الشحات mayar el shahat mayar el-shahat
