من خلال خبرتى المتواضعة و تصفحى لبروفايلات مختلفة على الفيس بوك, لاحظت ان فى كليشيهات ثابتة للبنات على الفيس بوك, و فيما يلى سنعرض اهمها..
ذات الكبرياء
دايما مجروحة, بس فى نفس الوقت مش هتيجى على نفسها و كرامتها..كل الى بتكتبه بيبقى من نوعية "انا امرأة لا انحنى الا فى صلاتى" .. و " صمتى لا يعنى جهلنى ولكن من حولى لا يستحقون الكلام" .. و مقولات لاحلام مستغمانى..غالبا صورة البروفايل بتكون ابيض و اسود و كلها دموع و جراح و غدر والايام و الزمن والحاجات دى..
الى بتحب على نفسها
كل بوستاتها حب و غرام و بوستات من نوعية اللهم ارزقنى بالزوج الصالح, و بوست من وحى خيالها عن حياتها المستقبلية مع جوزها و بتعمل شير لصور كتب رومانسية و شعر محمد ابراهيم .. و احيانا بتعمل شير لصور بيبيهات اجنبية و تكتب يوغوتى .. و اية القمر دا..و يا رب ارزقنى الى آخره..غالبا صورة البروفايل بتكون صورة بيبى او صورة couple من صفحة محمد سعيد فوتوجرافى..
المكتبئة دائما
مابتكتبش حاجة غير "ربنا ياخدنى وارتاح بقى" .. و " هو انا لو مت فى حد هياخد باله اصلا؟!" و "الدنيا بقت صعبة اوى.."
و غالبا مابيكونش فى حاجة معينة..لما حد بيسألها فى اية او مالك مابتردش..
السرسجية
Ana Aslun Moshkela ...او Banota crazy ..غالبا بتبقى كاتبة works at lesa badry .. و كل بوستاتها
yA Rappy aNa T3bT AwiIiIiIiIi .. و Proud to be egyptian و الفرانكو العقيم الى ماتفهمش هى بتقول اية او عايزة اية..
غالبا بتعمل شير لصور المشاهير زى كاتى بيرى و جاستن بيبر و تامر حسنى..
الفيمينست .. بأفورة
يعنى اية واحد يجي يساعدنى اركن؟ هو لحد امتى المجتمع هيفضل ذكورى متعفن؟! الستات بتعرف تركن زيها زى الرجالة بالظبط...لأ و احسن كمان.. "انا هرفع على زميلى قية عشان قالى اتاخرى مش شايف..له دايما الافضلية للـ"ذكور" فى المجتمع؟! ليه هو يشوف وانا اتاخر؟ ليه مش هو الى بتاخر ولا يغير مكانه؟! انا مش هغير مكانى تانى عشان حد يشوف..شير و افضحوهم"
بتبقى كل صورها بنات بتقوم بأفعال عادية جدا بس هى بتمجدهم و بتخلهم ابطال.. "البنت دى كلت النهاردة فول من على العربية" "البطلة دى جابت كومبو لارج مش ميديم..كلنا لازم نجيب كومبو لارج...مش هنسيبلهم الكومبو اللارج يا مجتمع!"
الحسودة
والى بتندب حظها و بتولول على طول..غالبا بتكون متجوزة, و اتصدمت فى الواقع, بتعمل شير لصور انجلينا جولى و براد بت و تكتب " حسرة علينا" .. و تعمل شير لصور ديكور و لبس و اماكن سياحية..طبعا كانت بتحسب ان كل دا هيكون ملكها لما تتجوز..بس بتفضل تندب حظها وغسيل املواعين و وقفة المطبخ و العيال ومشاكل جوزها وما الى ذلك…
ذات الانتماء السياسى
اسؤهن .. لأن غالبا بتكون مش فاهمة حاجة بس بتظيك فى الظيطة وخلاص.. اول ما تدخل البروفايل بتاعها تحس انك داخل ساحة معركة..مافيش بوست يعدى من غير خناقة..و كل صورها عبارة عن صور رمزية لانتمائها السياسى ده..
المتدينة
بوستاتها كلها دينية, آيات و احاديث و اقم صلاتك قبل مماتك و بتعمل شير لمقطع للشيخ العريفى و غالبا الحاجات الى من نوعية " لا تخرج قبل ان تقول سبحان الله" و بتكتب حاجات من نوعية لن نرتقى الا اذا انخفضنا لله ساجدين و الاعجاز العلمى للقرآن-الى غالبته بيبقى اشاعات او غير مثبت- و صور مصطفى حسنى و معز مسعود و الكعبة و اللهم بلغنا رمضان..
الطبيعية
و دى بتمثل حوالى 3% بس من بنات الفيس بوك .. و جارى البحث و التنقيب عن باقى الناس الطبيعية الى مش بتأفور فى اى حاجة و مش بتظيط..
