كلنا فى الدنيا دى سايقين على كوبرى اكتوبر, كل واحد مختلف عن التانى, كل واحد بيسوق بطريقة معينة, معاه عربية مختلفة, بيمشى بيها.
هتلاقى ناس مقتنعة بعربيتها مهما كانت بسيطة, او قديمة, او امكانيتها ضعيفة..و ناس معاها عربيات جامدة و كلها امكانيات بس مش حباها, ولا راضية بيها, و عايزة دايما تغيرها, من غير سبب مقنع.
هتلاقى واحد مابيعرفش يسوق ماشى بعربية BMW و تقول فى نفسك
هتلاقى الناس بتحكم على بعض من نوع العربية..و ناس الفضول و الفراغ بيخليهم يقروا نمر كل عربية طول الطريق..
ساعات هتحس ان الكوبرى طويل و مرهق و مابيخلصش..و ساعات الكوبرى هتشوفه قصير و خلص قبل ما يبتدى.
هتلاقى ناس دايما مترددة, مش عارفين كانوا صح لما طلعوا الكوبرى, ولا كان الاحسن انهم ياخدوا الطريق التانى؟!
هتلاقى ناس دايما عاملة حساب للكوبرى, بيمشوا بدرى عشان يلحقوا الكوبرى قبل مايزدحم.. وناس مش فارق معاها حاجة..
فى عربيات هتنزل فجأة و تسيب الكوبرى, و دا العادى..هتلاقى حد جى من اقصى الشمال لاقصى اليمين عشان لازم ينزل النزلة دى..هتتفاجئ, هتتعصب, بس هتنسى بعد دقايق..و هتكمل طريقك عادى.
ساعات الكوبرى بيقف وقفة سودة, و الوقفة بتطول, ولما تيأس من ان الطريق يفتح, هتلاقى الدنيا فكت...
ساعات وقفة الكوبرى بتأخرك عن حاجات كتير, بتأخرك عن شغلك وتاخد خصم, بتأخرك عن معاد مع حبيبتك و تزعل منك..
احيانا بتلوم العربيات الى واقفة قدامك و تفضل تسأل اية الى موقفهم و تتعصب..و تمشى قدام شوية تلاقى ان فى حادثة كبيرة عالكوبرى, ساعتها بتعذرهم, و تعرف انه مش بقصدهم..
بتحصل انك ساعات بتنزل نزلة غلط, بيبقى قدامك حاجة من اتنين, اما تمشى فى طريق مش بتاعك, و تروح مشوار مش ليك..اما ترجع لطريقك, بس السكة هتبقى طويلة و متعبة..بس فى الآخر هتوصل لمشوارك.
على كوبرى اكتوبر, هتلاقى عربيات اشكال و الالوان,موديل حديث شكله حلو, بس ضعيف.. و موديل قديم, باين عليه علامات السنين, و تخبيط الزمن..
فى عربيات هتبهرك لما تشوفها, بس بتحس ان مافيش امل توصلها فى يوم من الايام..
هتلاقى واحد فجأة يكسر عليك جامد, مع ان الطريق واسع ويكفيكوا انتوا الاتنين, هتستغرب هو بيعمل كدا ليه؟!
هتلغى شوية مشاوير عشان بس خايف تطلع الكوبرى..
فى على الكوبرى عربيات عطلانة كتير هتقابلك,اوقات هتساعد, و اوقات هتتعصب عشان موقفين الدنيا,و في يوم اكيد عربيتك هتعطل..
على كوبرى اكتوبر هتلاقى اعلانات كتير فى ناس بتاخد بالها منها دايما, و ناس بتتفرج عليها لما الطريق يقف بس, و ناس مابتبصش عليها اصلا..
الاعلانات موجودة من اول الكوبرى لآخره, و كأنها بتصبرك طول الطريق..
ملونة و مليانة سعادة و بهجة,لأماكن جميلة تحس انها لدنيا تانية, مافيهاش مشاكل, مافيهاش حاجة تخاف منها, مافيهاش كوبرى اكتوبر!
بس مش هتوصلها غير لما تعدى الكوبرى كله بسلام, برغم كل العطلة, و الزحمة, و التأخير..
