بقى فى مواقع و ابليكيشنز كتير جدا و مابقيناش ملاحقين عليهم..لذلك حاسة ان الضغط ده هيخلق فرص عمل متنوعة بحلول عام 2015 مثلا.... احنا فى 2015 فعلا..يبقى بحلول عام 2020 مثلا.. الوظايف دى هتبقى متعددة..و متخصصة..و كل واحد فينا هيشغّل مجموعة من الناس عشان يلاحق يبقى على كل الابليكيشنز.. كل واحد منهم هيكون مسؤل عن حاجة معينة.. زى مثلا;
- واحد يكون مسؤل عن قراية رسائل الـ others فى الفيس بوك و الرد عليها مع أخذ سكرين شوت لزوم السف وكده.
- واحد يكون مسؤل عن العلامة الزرقا فى الواتساب و يشوف مين قرأ الرسايل و ماردش لما شافها، مع مراقبة الـ online والـ last seen
- واحد يفضل يعمل سيرش على اسم صاحب الأكونت على كل المواقع و يشوف لو حد جاب سيرته او سف عليه من غير ما ياخد باله.
- واحد مخصص للكومنتات، خصوصا فى الامور الجدلية و الصفحات الى كل الناس بتتخانق مع بعضها فيها زى ثورة بنات مثلا، او اى صفحة للثورة او للأخوان.
- واحد يكون جاهز ببوست طويل جدا عن اى حدث يحصل فى اى وقت مليئ بالتفسيرات و التبريرات و التنظريات والمزايدات والحاجات دى.
- واحد ماشى فى كل حتة يجمع صور افشات الافلام لزوم الـ photo comments.
- واحد يفضل يدقق فى الكلام و يصحح الاخطاء الاملائية و يحط صورة عمرو واكد.
- واحد وظيفته يشوف مين سرق من صاحب الاكونت تويت او بوست و يفضحه.
- و واحد يشوف مين عامله فولو باك و الى مش عامل يعمله انفولو..
- واحد يكون مسؤل للرد على الناس الى بتلومه لأنه ماردش على الواتساب، مع انه نزل صورة على سناب شات..
