فلسفة الاعتذار عند المصريين | ميار الشحات

كلنا بنغلط, لكن مش كلنا بنعتذر, خصوصا لما يكون الوسط المحيط بينا مش بيساعد على الاعتذار ابدا..طبعا ده مش مبرر, لكنه سبب مهم.

احنا لازم نتقبل ان اى حد بيغلط, مهما كانت درجة قرابته بينا, و ان احنا كمان بنغلط بردو, و زى ما بنبقى عايزين الناس تسامحنا, لازم نسامح الناس التانية.. كلام قد يبان انه تنمية بشرية جدا..ولكن هو تنمية لترييح الدماغ مثلا..
الموضوع بيبدأ من الطفولة, العيل من دول يغلط تلاقى  اهاله يقولوله

"SAY SORRY!"

الولد يرد ببراءة "say sorry"

- حماااادة!! ولد!.. say sorry..sorry bs!

-sorry

و حمادة اصلا ولا عارف اية سورى دى ولا بيقولها ليه ولا يعنى اية ولا اى حاجة.. بس بيقول سورى وخلاص عشان يخلص من زن ابوه و امه و يمشى يشوف حاله..

انا واحدة من الناس بحب اعيش فى سلام, بفصل من المواضيع الى بتاخد وقت..لما بغلط بعتذر, مش مثالية منى قد ما هى محاولة لتفادى الحوارات الكتير و الرغى و الهرى, و بعتذر مباشرة عشان نخلص الموضوع فى ساعتها و خلاص..

لكن مش دايما الموضوع بيبقى بالسهولة دى, فى ناس لازم تصعّب عليك الموضوع, و بيكبروا الموضوع مهما كان تافهة, و مايصدقوا بقى يكتبوا على الفيس بوك حاجات تلقيح, و ما اصعب ان تأتيك الضربة من اقرب الناس :)
الناس دى بيفصلونى منهم جدا, المشكلة لو كنت فعلا بحبهم, بضطر استحملهم و احايلهم مع انى بكون بتمنى انهم يخلصوا المواضيع بالساهل.

انا بقى لما حد يعتذرلى بطلع كل الى جوايا تجاهه, بحيث انى اسامحه بجد..بس ده فى حالة ان الى قدامى ده يفرق معايا..لكن لو كان شخص مش فارق معايا هقبل الاعتذار كده و خلاص..

يا ريت يا جماعة نسهل على بعض الموضوع, و نعتذر لما نغلط, و نعرف اننا كلنا بنغلط عادى يعنى, و كلنا بنعمل حركات ندالة, فيعنى احنا فى رحلة خليكوا فريش..