لو حد من صحابك استندل معاك مرة,بتسامحه..مرتين,بتجيبله اى اعذار..لو زود عن كدا؟
بتبدأ تدخل فى مود بشع..و تسمع اغانى عن أد اية الدنيا غدارة..وبختى مال من صحابى الشمال و ضربت الودع مالقتش صاحب جدع,الخ
وبتكتئب و بتزعل و بتتعقد وتجيبلك كام ستيتس عالفيس بوك تلميح و تلقيح ..على كام تويت و ايية..انت كدا تمام..
بس الحقيقة انت مشكلتك مع نفسك مش مع صاحبك -الغدار- دا..انت يا اخى لازم تتصالح مع نفسك..لازم تجرب السلام الداخلى دا..الى هو تمشى بمبدأ انا واخداه مبدأ اساسى ليا-بحاول على قد ماقدر يعنى-
ماتستناش حاجة من اى انسان..مهما كان..لو عمل حاجة وحشة مش مهم,انت اصلا مش مستنى منه حاجة ..و لو عملك حاجة كويسة..لازم تقدره جدا..
الحقيقة ان احنا بنحمل الناس فوق طاقتها..وبعدين نزعل منهم لما يخذلونا..هما مش بيخذلونا لأ..احنا الى بنتخيل..
الموضوع ببساطة,ان انا ماينفعش الوم حد على دور انا -مع نفسى كدا- اديتهوله بناءا على مكانة انا ادتهاله فى مخيلتى..و وارد جدا..يعنى مثلا 95%من الحالات بيكون الشخص دا ماعندوش اى خلفية عن مكانته عندك..فبالتالى مش بيبذل اى مجهود انه يبهرك مثلا, او فى انه مايخذلش توقعاتك..وانت لما بتلاقى كدا بتتصدم..بتزعل..وبتعيش فى دور الضحية..
المشكلة كمان ان ماحدش بيطلع نفسه غلطان..وان ماحدش بيلتمس العذر لحد..وان كله بيلوم الطرف التانى..وان دور الضحية سهل كدا و بيحسسك اد اية انت كيوت!
اغلب مشاكلنا هتتحل لو كل واحد حط نفسه مكان الطرف التانى و تصور رد فعله وبناءا عليه يتصرف.
______________
ميار الشحات
No comments:
Post a Comment
Leave a comment before you go :)