العيلة الافتراضية

كل واحد فينا اتولد و لقى له عيلة هو ماخترش افرادها..فى منهم الكويس وفى منهم اللئيم..فى الى تستريحله و فى الى تكره تشوف وشه..فى الى يخاف عليك و يحبك من قلبه..وفى الى بيكرهك ويتمنى اى مصيبة تحصلك..و فى الى مابيعرفكش غير فى المصالح بس..و فى انواع كتير اوى

عموما,انت مالكش ذنب..انت اتولدت لقيت الافراد دى..و قالولك ان دول عيلتك..مجرد انهم قرايبك او انهم من عيلتك دا مش معناه وجود صلة حب و مودة بينك و بينهم..عادى ممكن يكونوا قرايبك ومابتحبهمش..مابتشوفهمش يمكن غير كل فين وفين-بغض النظر عن صلة الرحم- و ممكن ناس مابتربطكش بيهم اى قرابة تكون بتحبهم جدا..اكتر من ناس كتيرة فى عيلتك..بتحبهم و بتخاف عليهم ومافيش بينكم مصلحة..وهما كمان بيحبوك وبيتمنولك الخير مش عشان هما قرايبك و دا واجبهم او اى حاجة من دى.

عشان كدا انا دايما بعترض على جملة شهيرة فى مصر و هى "يا عم هو كان من بقيت عيلتنا؟!" الجملة دى غلط شكلا و موضوعا..ما اصل حاجة من الاتنين. لو انت شخص بتحب عيلتك و قرايبك اوى,دا مش معناه ان اى حد خارج نطاق عيلتك يولع..والعكس صحيح..ممكن يكون الشخص الى مايقربلكش حاجة دا,بتحبه جدا اكتر من ناس كتير قرايبك..اذا لا يصح عليه القول.

فلو انت قرايبك ناس بشعين ولا يطاقوا,عادى دى مش نهاية الدنيا..ماتدخلش فى اكتئاب وكدا

انا مثلا,عاملة لنفسى عيلة غير عيلتى الى اتولد لقيتهم..الى انا اجبرت عليهم وهما اجبروا عليا..ناس انا بحبهم جدا وهما كمان..بدون ادنى مصلحة او اى سبب حتى لو كان قرابة..والموضوع دا مريحنى نفسيا جدا..فجرب انت كمان تعملك عيلة غير عيلتك التقليدية و هتحس بفرق جميل. ________

ملحوظة: انا بتكلم على العلية مش الاسرة..و الفرق بينهم معروف,لذا وجب التنويه

______________
ميار الشحات