ارغب فى شراء كل شئ,وانا مش لاقية آكُل

• عايزة اشترى آيباد اير
• عايزة اشترى كاميرا كانون بوفيشونال
• عايزة اشترى عربية تلمنى كدا
• عايزة استولى على كل محلات اللبس و الجزم و الشنط
• عايزة اقتحم فيكتوريا سيكريتس
• عايزة انسف باسكين روبينز
• عايزة اسافر -وعاملة خطط سفر كاملة شاملة بالفعل- على امل انى هنفذها يوم من الايام
• عايزة اشترى لاب توب ماك برو اجمد حاجة موجودة عشان البرامج ماتفضلش تهنج منى وانا بشتغل
• عايزة اشترى حاجات كتيييييير عشان الرسم
• عايزة اشترى كمانجا و آخد كورس اتعلم الاساسيات

عايزة كل دا,وانا كل الى حيلتى دلوقتى متين جنيه مثلا

عايزة اقولكم ان كل او اغلب الحاجات الى فوق دى ممكن الاستغناء عنها,ولو جبتهم عادى يعنى مافيش حاجة هتحصل,مافيش تغير فى يومى هيحصل,مودى هيفضل زى ما هو,هيفضل متقلب و مزعج ,انا جربت الحوار دا كتير..ابقى هموت على حاجة و اول ما اجيبها خلاص,ولا كأنى اعرفها..مع ان الحاجة دى بتبقى مهمة جدا قبل ماجيبها,بس بعد ماتيجى بحس انه عادى يعنى ممكن استغنى عنها..وبحس انه اية الهبل دا انا كنت هموت عليها كدا ليه؟

الحاجة الوحيدة الى مش ممكن اتنازل عنها هى السفر..السفر هو الشئ الى انا عايشة علشانه و على امله..مش متخيلة انى اعيش و اموت من غير ما اشوف اى حاجة من الكوكب دا كله غير مصر و السعودية بس! اية دا يعنى؟! ماينفعش!..الواحد لازم يشوف جنة الله فى الارض,اهو يضمن اى جنة وخلاص
____________
ميار الشحات