اليوم الى حصل فيه التلت انفجارات،انا كان مفروض عندى محاضرتين،وكنت عاملة حسابى انى هروح عادى،صحيت الصبح و فطرت و لبست و نزلت و طلعت : D
اول ما نزلت من البيت طلعت تانى,قولت فاكس جامعة النهاردة يعنى,بما ان اليوم الى قبله كان فى قلق جامد و اقتحموا كليتنا و حاجات كدا..المهم طلعت البيت و قررت انى مش هروح..
اذ فجأةً اقيت التايم لاين كله بيكتب عن انفجار حصل فى الجامعة..ماكنتش مجمعة حاجة طبعا بس اتخضيت جدا على صحابى الى هناك,,فضلت اتصل بيهم بس طبعا الشبكة قوية جدا و من كتر ما هى قوية و مجمعة كنت كل ما اتصل بحد "عفوا,مغلق او غير متاح".. "سورى والله,مغلق او غير متاح" .. "ما قولنا متنيل مغلق او غير متاح!!"
فى الظروف العادية هربط بين ان موبيلاتهم مقفولة و بين انهم جوا المبنى,لكن بما انى لسة قارية عن انفجار,و بما ان خيالى ما شاء الله واسع جدا,سيناريوهات عمالة تروح و تيجى فى دماغى
"يالهوى..يمنى انفجرت؟!..انا كنت حاسة انها هتموت منفجرة..طب هقول لمامتها اية؟..طب مين هيعمل معانا الاسيمنت؟!"
الاسيمنت طبعا اهم حاجة..
المهم,شوية و لقيت انفجار تانى..فى نفس المكان..
شوية و مافيش اصابات..
بعدين اصابة لواء و عميد
شوية و لا لا دا اصابة عميد و لوائين و طالب..
شوية و..
المهم ان يمنى مانفجرتش..الحمد لله..
بعد ما اطمنت على الجميع,
و هديت شوية كدا..
فكرت "ماذا لو كنت انفجرت؟!"
ايوة يعنى لو كنت مُت فى انفجار من الانفجارات دى,كان هيحصل اية؟
مثلا عيلتى هتزعل جدا,بس فى الفترة دى اخويا كان مستنى ناس يردوا عليه و يقولوله اتقبل فى الشغل ولا لأ,,و ماما كان عندها كام مشكلة كدا..و اخواتى الاتنين اصغر منى,والحقيقة مش عارفة كان هيبقى رد فعلهم اية,,
صحابى؟ هيتصدموا و يعملوا هاشتاج , يكتبوا بوستات على جروبات الدفعة..و نزلوا صورتى مع شوية كلام كدا..
الاسبوع الى بعده بالظبط هينسونى..
الاسبوع الى بعده الشركة اتصلت بكريم,وقالوله انه اتقبل فى الشغل,,و ماما كلمها المحامى وقالها ان كله تمام,,و اخواتى اتغلت لهم امتحانات الميد تيرم,
البيت هتملاه الفرحة,كل واحد فيهم هيبقى فرحان بالحاجة الى حصلتله..وانا خلاص,هينسونى خالص,ولو حد فيهم افتكرنى..حد تانى هيقول "ماتقلبهاش نكد بقى"..سيرتى بقت نكد :)
انا طبعا بحبهم جدا..ومش عيزاهم يزعلوا لحظة بسببى,انا فعلا لما باجر افكر فى موتى,بزعل اوى لأنى هكون السبب فى ان اكتر ناس بحبهم يزعلوا..ولو لحظات..
بس الفكرة انى مش عايزة اموت دلوقتى,مش عايزة اموت قبل ما اسيب بصمة حلوة جدا فى الدنيا,تخلى الناس احسن,,بشكل او بآخر,,مش عايزة آجى الدنيا واسيبها من غير ما اكون عملت حاجة فعلا..
مش عايزة ابقى زى ملايين من الناس الى جم و راحوا وبين الاتنين ماعملوش حاجة!
عملك هو الى باقيلك..ولو ليك حد مخلص,يفضل شايلك فى قلبه,يفتكرك فى كل لحظاته,و يشوفك كأنك موجود معاهم..تبقى انت محظوظ جدا..
انا بدعى انى افضل مخلصة جدا لجدتى الله يرحمها,افضل ادعيلها على طول,واعملها حاجات تفرحها و هى هناك,,مش عايزة اخذلها زى ما كل الناس خذلوها و نسيوها و يمكن مابتجيش على بالهم,,دلوقتى هى عارفة انا اد اية بحبها..لأن كل دعوة بتوصلها..بتعرف انى لسة فكراها..انا فعلا بحبها جدا..ادعولها لأنها كانت انسانة عظيمة جدا :)و يا ريت تحاول تسيب اثرك الطيب فى الدنيا قبل ما تمشى..
____________
ميار الشحات
