فى حب ورق العنب

ورق العنب من اكتر اربع خمس حاجات مبهجة فى حياتى,

اليوم الى ماما بتشترى فيه ورق عنب بفرح جدا,الى هو فى امل ناكل ورق عنب قريب..

دا غير اليوم الى بشوف فيه ماما بتحضر الورق و الحشو..

دا غير ساعة لما بشوف ماما بتلفه..

دا غير فرحتى لما بسمع ماما بتقولى "خمس دقايق و يكون جاهز,,حضرى السفرا يلا"

دا غير لذتى وانا بكالُه..

و بحاول اسيب شوية لبليل..

بحبه جدا..ممكن اكله كل يوم عادى و مازهقش..

ولعلمك يعنى الورق عنب له طرق كتير..

فى ورق عنب سلطة "العشق"

و فى ورق عنب الحشوة بتاعته بيبقى فيها لحمة "حب خاص"

و فى ورق عنب الحشوة بتاعته بيبقى فيها طماطم "صديق وفى"

المهم انى فكرت كدا,,هل ممكن الاقى شخص احبه اكتر من الورق عنب؟

يعنى مثلا يكون فى قدامى طبق ورق عنب كدا,وانا اسيبه و اقوم عشان اكلم الشخص دا مثلا؟

اكيد لأ :D

هل مثلا فى شخص هيفرحنى وجوده اوى كدا ؟

اكيد لأ بردو :D
هل فى شخص مش هزهق منه مهما اتعاملنا مع بعض؟
اكيد لأ,انا بمل الأشخاص..
هل فى شخص يقدر يكون بأكتر من طعم؟ و كل طعم احبه اكتر؟
اكيد لأ,اغلب الاشخاص روتينيين بشكل مثير للغثيان..

طب هل فى شخص هحاول على اد ما اقدر انى اخليه معايا اطول فترة ممكنة زى ما بعمل مع الورق عنب,,بحاول اسيب حبة لبليل وكدا

اكيد لأ بردو :D

رسالة لك عزيزى,اتمنى  ان تكون ورق عنب قلبى..

____________
ميار الشحات