خلاصة اغلب مسلسلات رمضان كل سنة | ميار الشحات

يجى رمضان ومعاه كمية مهولة من المسلسلات, لدرجة ان فى مسلسلات مابتبقاش عارف اصلا انها موجودة, و تكتشفها بعد رمضان بكام شهر كدا..
المهم ان اغلب المسلسلات دى بيبقوا عايزين يوصلوا فكرة معينة, درس مستفاد يعنى او moral story تستنتجها بعد ما المسلسل يخلص..

المسلسلات التانية بقى بتتمحور حول 3 قصص لا رابع لهم,

اولا: الناس الفقيرة حياتهم احسن من الناس الغنية.
عزيزى المؤلف, انت غلطان..
احنا اصلا شعب فقير.. اكتر من 85% من الشعب فقرا..وغلابة وعلى اد حالهم..عايزة اقولك انهم مش مرتاحين نفسيا اوى كدا زى مانت فاكر و بتبين فى مسلسلك العظيم..عندهم مشاكل كتير جدا اصلها العجز المادى..
الأب والأم بيبقوا بيفكروا ازاى يوفروا لولادهم اساسيات الحياة فى وسط الغلا دا كله..
البنت بيجيلها فترة بتشوف ان الجواز هو المخرج الوحيد من حالتها دى, وانها لازم تتجوز واحد غنى, على الاقل اغنى منها..
الولد بيبقى عايز يتجوز بس مش عارف عشان مابيشتغلش, و لو بيشتغل فهو مش "مكون نفسه"
الاب و الام و البنت و الولد بيتعرضوا لضغوط باستمرار, واحنا عارفين ان الغلط بياخد شكل  "دى فرصة ماتتعوضش" , فأغلبهم بيعمل الغلط و هو فاكره فرصة, فحياتهم فى الغالب بتدمر..

اة, و بالنسبة للطبقة الغنية, فهم مش زى مانت بتصورهم فى المسلسل..
 Guess what, ولادهم مش فشلا وضايعيين,بالعكس بيتعلموا كويس, و حياتهم الاجتماعية ممتازة..ماشى فى منهم بيفشلوا او بيضيعوا بس دا بيحصل فى اى دايرة صحاب مهما كان مستواهم, ان الصاحب ساحب و الحاجات دى..
 الاب مش لازم يخون مراته مع السكرتيره الى فى شركته, و الام مش دايما تافهة, او كل وقتها فى الجمعيات الخيرية عشان المظهر الاجتماعى, وعادى ممكن تكون بتشارك فى الحاجات دى عشان هى عايزة تعمل خير فعلا..
 و على فكرة الطبقة دى بيتجوزوا من بعض, مش زى مانت بتورينا فى الحلقات, ان الولد حب بنت مسكينة و فقيرة جدا و اتجوزها, والبنت هكذا, حبت واحد بيشتغل عند ابوها فى المصنع واتحدت العالم عشان يتجوزوا, و بيتحوزوا فعلا والكلام دا..
عايزة كمان اقولك ان مش كل الاغنيا حرامية, انا معاك ان اغلبهم حرامية بس مش كلهم..

المخرج والكاتب والعاملين على المسلسل بيبقوا عايزين يرضوا المشاهد الفقير, و يطبطبوا عليه كدا..بأسلوب ساذج جدا..الى هو "شايف الاغنيا بيتخرب بيتهم ازاى؟..شايف الاغنيا عيشتهم مش مرتاحة ازاى؟..شايف ربنا غضبان عليهم ازاى؟! شايف بقى الفقرا مرتاحيين ازاى رغم فقرهم؟..شايف ولادهم ناجحين اد اية..خليك بقى فقير كدا و احمد ربنا, لاحسن لو بقيت غنى هتبقي عيشتك سودا :) "..بحيث انه يبقى راضى عن حياته, و مستواه المادى و الاجتماعى نوعا ما..
و موضة غريبة جدا بقوا بيطلعوا الشخصيات بلطجية و جدعة فى نفس الوقت! و بيصدروا مفهوم خاطئ عن الرجولة و الجدعنة, الى عادة بيصاحبها فتونة..
يا ريت تبطلوا النوع دا من المسلسلات لأنه فاشل ومبقاش ياكل خلاص الكلام دا, دا بقى يزود الحقد الطبقى و خلاص..

ثانيا : المسلسلات الاكشن.
المسلسلات الى بيكون البطل فيها ظابط, الى بيصلح كل حاجة دا, الى بيجيب حق الغلابة  و بيتعامل مع كل الناس بضمير و احترام..الى هو مافيش منه فى الحقيقة دا.. الشهم الى بيتعرض عليه رشوة و مابياخدهاش, الى بيفضل ورا المجرم لحد مايطلع عين امه, الى غالبا فالآخر بيتقتل دفاعا عن الوطن.. *دموع*

او, المسلسلات الى بيبقى البطل فيها هو المجرم نفسه, دا بقى بيبقى اخطر واحد فى صحابه,مابيموتش, مابيعملش غلطة,مابيجيلوش برد حتى..
مطلع عين الظابط و وزارة الداخلية والخارجية..و النوع دا بيكتر فيه مشهد الظابط وهو متغاظ منه و بيقول " وحيااااااااة امى,لاجيبك" ..
المهم ان النهاية غالبا بتكون ان الحرامى دا حب واحدة, و غيرته, و سبحان الله فى خلال حلقتين على اقصى تقدير يكون بقى انسان كويس و محترم و كل الحاجات الكيوت دى, لدرجة انه ممكن يروح يسلم نفسه للبوليس *سقفة للنجم*

ثالثا : الكوميدى
................................ بلاش.
بلاش تعملوا كوميدى, الى بيعمل مسلسل كوميدى بيكون معلق لوحة كبييييييييييرة فى بيته مكتوب عليها " احنا شعب ابن نكتة" "احنا شعب دمه خفيف" والكلام الجميل دا الى بيكون مصدر إلهامه, والى بتخليه يعمل مسلسل او sitcom. ابن كلب :)
و تلاقى الكتب بيستخف دمه بطريقة اوفر, والممثل بؤدى بطريقة مفتعلة جدا..و بتتفقع مش بتضحك و عامة ماتتوقعش تضحك وانت بتتفرج على اى مسلسل مصرى يصنف على انه كوميدى ..طبعا  المسلسلات الحلوة بيبان انها حلوة يعنى..عموما كل سنة وانتوا طيبين و نستمتع بالاعمال الفنية الحلوة و اعاده الله علينا بالخير و اليمن و الحب و البركات والحاجات الكتير دى..

ميار ميار الشحات ميار_الشحات ميارالشحات mayar mayarelshahat mayarel-shahat Mayar El-Shahat mayar elshahhat