نتيجة الثانوية العامة | ميار الشحات

المرار الطافح.. او الثانوية العامة يعنى..مأساة بكل ما فى الكلمة من معنى..
بتبقى عامل حساب للمرحلة دى من وانت فى ابتدائى, وانت بتسمع اساطير الثانوية العامة كل سنة..
و عن قريبك الى كان حابس نفسه طول السنة عشان يدخل هندسة و فى الآخر مدخلهاش على نص درجة, وانتحر ..
و ابن خالك الى ابوه نفسه يطلع دكتور زيه و كان بيعذبه عشان يذاكر و يدخل طب..

انا كنت افشل واحدة فى العالم, وانا صغيرة و لحد 6 ابتدائى كنت بمتحن فى السفارة فى السعودية, سفارة يعنى بتذاكر فى البيت لوحدك كام شهر كده و تروح تمتحن الترمين على بعض, المهم انى ماكنتش بذاكر بقى, وكانت درجاتى تتراوح بين ال80-70 %

دا كان عار بالنسبة لعيلتنا, لأن كلهم دحيحة, خصوصا اخويا الكبير, الى ماكنش بينقص نص درجة تقريبا..
فأنا طبعا كنت فى نظر العيلة انى فاشلة, وانى مش بتاعة تعليم, و انى آخرى هدخل اى كلية خاصة والكلام دا كله..
لغاية لم جيت مصر و دخلت مدرسة فاشلة بردو, مدرسة خاصة فى الزمالك, حضرتك تاخد الدرس مع المدرس من هنا, تاخد الدرجة النهائية من هنا! و هو دا قمة الاعجاز التعليمى! و فضلت على الحال دا لغاية اولى ثانوى, كان الموضوع ماشى بالحب, و كنت بطلع الاولى على المدرسة بردو بالحب..
خلونا مانعرفش يعنى اية نذاكر, يعنى اية نركز و نفهم والكلام دا..مش مهم,المهم الدرس..انت تديلهم فلوس, و هما يدولك درجات.. win-win situation يعنى.

جيت فى آخر امتحان فى اولى ثانوى كان مفروض اختار هبقى علمى ولا ادبى .. لما مسكت الورقة قعدت افكر فى مليون حاجة

من زمان كان نفسهم انى ادخل طب او صيدلة..و خصوصا طب..
المقارنات الى كانت دايما تتعمل فى المجال الدراسى بينى و بين اخويا, الى كان فى هندسة ساعتها..
طب انا هعمل اية؟..هختار اية؟ انا اصلا عايزة ادخل كلية اية؟ ..انا مش عايزة ادخل اى كلية..عادى، بالنسبالى كلهم سيان، مؤمنة ان الكلية مالهاش دعوة بالى عايزين نشتغله..و اصلا اوبشنز الكليات عندنا فى مصر محدود جدا..
فنون جميلة اقربهم الى قلبى..لما حد يعرف انى عايزة ادخل فنون جميلة كان يقولى هتطلعى اية؟ مدرسة رسم؟!..

انا مش فاهمة اية الى جاب فنون جميلة لمدرسة رسم, بس ما علينا...
اكتب اية..علمى ولا ادبى..لو علمى علمى علوم ولا علمى رياضة..
سلمت الورقة وانا مختارة ادبى..لأن ببساطة انا مش عايزة ادخل اى كلية علمية, دا غير ان انا و زى ما قولت قبل كدا مابعرفش اذاكر, ماخدتش على كدا..لو دخلت علمى حرفيا هفشل, خصوصا ان اغلب مواده تراكمية, لو دخلت ادبى ممكن بكون فى امل..

وكالعادة كنت خايفة جدا وانا داخلة على ثانوية عامة, و حجز الدروس فى السنتر, و بداية الدروس فى شهر 8! مش عارفة ليه يعنى, بس يلا هو كدا..عشان دى ثانوية عامة..
دخلت اول حصة فى درس العربى, كالعادة كنت متأخرة, دخلت لقيت المستر بيسمع للعيال "نحو" ..آة اول حصة..و بيسمع..و بيسمع نحو..والعيال بتجاوب عادى.

مش عارفة ازاى فى شخص ممكن يسمع نحو! كنت قاعدة بتفرج, مذبهلة مش عارفة اية الى بيحصل..ما علينا, تانى يوم درس فرنش, اة انا كنت مدرسة لغات و الفرنش هو اللغة التانية عندى, بس زى ما قولت, الموضوع كان بالحب, فمكنش فى دراسة كويسة للفرنش, اكتئبت, قولت انا كدا فى 50 درجة فرنش مش عارفة هعمل فيهم اية..ما علينا, تانى يوم جيولوجى, مش فاهمة ولا كلمة من المستر..
على نهاية اول اسبوع كنت على وشك قطع الشريان او الانتحار, مافيش ولا مادة حساها سهلة او هقدر اذاكرها غير الانجليش بس. يعنى كدا الحمد لله معايا 25 درجة :D

دا غير المحادثات الجانبية الى كنت بسمعها بين ماما و اخويا ..دى مش هتجيب مجموع.. دى مش هتلحق حاجة ولا حتى خدمة اجتماعية..دى بلا بلا بلا..

الكلام دا كان بيضايقنى جدا, جدا..
مش غلطتى انى كنت وانا صغيرة تبع السفارة,
مش غلطتى انكوا دخلتونى مدرسة كل هما الدروس..
مش غلطتى انكوا خدتوا عنى فكرة انى فاشلة او انى بمعنى اصح غبية!

قولت انى لازم ابذل اقصى جهدى, مش عشان عايزة ادخل كلية معينة, مش عشان بعبع الثانوية, مش عشان اى حاجة غير انى اقولهم انتوا غلطانين بس.

دا شوية كلام على ورق, مش هعرف اذاكره؟ خلاص لو انتوا مخليين دا مقياس الذكاء, او النجاح, او الانجاز, اوكيه, نشوف.

"ربنا مابيضيعش تعب حد" كنت دايما بقول كدا, و بدعى ان ربنا يساعدنى انى اجتهد الاجتهاد الى يخليه يكرمنى بكرمه مش على مجهودى, و كنت على طول بدعى ان ربنا يساعدنى..
كان هدفى انى اجيب اعلى سكور عشان التنسيق مايجبرنيش على حاجة معينة, و بعدين ابقى اختار الكلية..انا لغاية ما خلصت امتحانات 3 ثانوى ماكنش فى كلية معينة عايزة ادخلها غير يمكن فنون جميلة..الى تشاء الاقدار انى ماعرفش ادخل امتحان القدرات لأنى كنت مسافرة ساعتها وكان شبه مستحيل انى ارجع مصر فى الوقت ده..

و عدوا السنتين دول, و جبت فى السنتين على بعض 95.25

فترة النتيجة كانت مزعجة جدا, ماكنتش بعرف انام من القلق, كان كل الى مسيطر على تفكيرى النتيجة, كل ماسمع خبر عن النتيجة قلبى يقف.. دى اعراض عادية, مش هفضل اقولك بقى فُكك و اية يعنى والكلام دا..
و انتظار التنسيق كان ممل جدا..
خصوصا انه اسبوع كامل انا و ماما بنتخانق عشان هى عيزانى ادخل سياسة و اقتصاد وانا مش عايزة ادخلها..اسبوع كامل متخانقين بسبب الموضوع دا..
التنسيق طلع و جبت اعلام القاهرة...
كنت سعيدة جدا..مع انى عمرى ما فكرت فى اعلام..بس فعلا فرحت و كنت مبسوطة بالكلية دى..و خلصت اول وتانى سنة فيها اهو بامتياز الحمد لله :D

و دى قصتى مع الثانوية باختصار :D

الى عايزة اوصلهولك:

الثانوية دى مش آخر الدنيا, فى حاجات كتير جدا جاية اهم منها, هى اة مهمة, بس مش قوى يعنى..
انت غالبا بتقرأ الكلام دا وانت مستنى النتيجة, فأنت مافيش فى ايدك حاجة تعملها, غير انك تدعى ان ربنا مايخذلكش, و ربنا مش هيخذلك.
لو انت لسة هتبدأ الثانوية ماتخليش التارجت بتاعك كلية معينة, خليك عايز تجيب اعلى سكور ممكن, عشان التنسيق مايفرضش عليك حاجة, مين عارف, ممكن تفكيرك يتغير, و ماتبقاش عايز تروح الكلية دى.
تعامل معاها كأنها سنة عادية جدا..انا كنت بقعد عالنت و برسم بالساعات..و بضيع وقت كتير جدا جدا جدا ..و كنت بشتغل كمان, بس لما كنت بقعد اذاكر كنت بذاكر بجد.
خلى نيتك نضيفة كدا, ماتبقاش بتذاكر و تقول انك مابتذاكرش و فاشل و هتسقط و هتشيل والكلام دا..و بدل ما تقلق الناس طمنهم.
اتحدى نفسك.
ماتخنقش على نفسك عشان ماتنفجرش و تقدر تكمل.
اة الثانوية مش هى الى بتقرر نجاحك او فشلك, و هى حاجة "ثانوية" جدا , بس يمكن دا اول حوار تتعك فيه و تشيل مسئوليته لوحدك..