فتشوا فى الحاجات القديمة.. و دوروا فى الادراج, هتلاقوا حاجات كتير..
ذكريات و صور هتعيشكوا لحظات جميلة..
انا بحب افتش فى الحاجات القديمة, الحاجات المستخبية, المنسية.. الحاجات المتأجلة, المتسابة..
من شوية فضلت ادور فى الادراج، لقيت جوابات اتكتبت وماتبعتتش..لقيت صور متشالة للذكرى..لقيت خاتم لعبة كان له ذكرى معينة..لقيت شنطة صور لينا واحنا صغيرين و صور لماما و بابا و هما مخطوبين..الحاجات ساعتها كانت مختلفة عن دلوقتى..
لقيت شرايط كاسيت لكولكشن اغانى تسعيناتى .. و لقيت البومات هشام عباس، إيهاب توفيق، و حميد الشاعرى.. لقيت اقلام و ساعات و نضارات شمس قديمة..
لقيت كتب قديمة، وملاحظات مستخبية جواها..لقيت رسومات لماما كانت عملاها فى حصة الرسم و هى فى خامسة ابتدائى..
لقيت جرايد ايام النكسة..و حرب اكتوبر..لقيت صور لناس انا ماعرفهمش..
اخلقوا ذكريات لبُكرا..و فتشوا فى ذكريات امبارح.
ميارالشحات
